Mangrove

Gandheng runtung-runtung mencaki bumi pahlawan

Ing sisih lor segara surabaya aku nduweni crita

Crita dalan kang padhang

Crita kang reruntungan

Crita wernane dina

Mangrove panggon kang endah

Kebak rasa asih ing sadalan-dalan

Mangrove panggon kang tidhem

Kebak rasa ayem

Sesandhingan ing papan jembar

Mangrove bisa dadi crita

Para mudha kang lagi kebak rasa

Para mudha kang lagi andum rasa

Para kulawarga kang lagi ngebur rasa

Para siswi kang lagi nliti guna lan cara

Mangrove bisa dadi tamba

Mangrove ayo padha kita jaga lan kembangna

Supaya anak-putu bisa niru

Surabaya, 21 April 2014

Read More

22 taun

Dalan pancen ana lurus lan menggoke

Uga ana dalan kang buntu

Nanging dalan iki wis dakpilih

Pilih-pinilih nemu winih

Peteng wis ora wancine

Lampune wis katon abyor ing kiwa tengen

Pedhut-pedhut ing mburi uga padha luluh merga suminare

Isih 22 taun! Durung wancine sungkem ing bapa lan biyung

Durung wancine nata lan tata-tata merga sih butuh ditata

Dalan ing ngarep isih akeh pedhut

Durung jelas wujud lan maksud

Dalan ing ngarep uga bisa buntu yen ora ana rasa nrima, ngalah lan pasrah jroning dhadha

Dalanku dalanmu pancen isih durung ana jluntrung

Nanging dalanku-dalanmu bakal nuwuhake crita kang arum.

Insyaallah...

Surabaya, 21 April 2014

Read More

Critaku karo Si Ndul

Ndul, wiwit dina iku aku janji

Janji kang dakdasari jroning ati

Janji iku isih ngrembaka jroning dhadha

Kaya banyu segara kang isih tetep kebak

Ora bakal asat.

Ndul, banyune digawa angin

Kayata urip iki mung melu lakune angin

Aku pengin awakmu

Ya mung awakmu sing menehi werna ing sisa dinaku.

Ndul, wis setaun mlaku bareng

Maneka warna pacoban sing ndadekake trataban, tetangisan uga ndadekake ati kalaran.

Alhamdllh, bisa tangi saka ngipi sing rasane mung sawengi

Nyaponi reregedan sing tumemplek, dibilas wudlu saben manjing lan dedonga saben sujud

Gusti Allah menehi pepadhangan marang awake dhewe

Dalan ing ngarep wis jelas

Ngramut rasa sing ana

Didadekake nyata sujud bebarengan ing balaiwisma

Surabaya, 24 maret 2014

Read More

Bun ing Godhong Garing

Godhong-godhong padha alum

Banyu udane wis ora diendum

Diombe dhewe merga akeh kasiate

Apa ora krasa!!!

Anake kalunta-lunta

Ngalor-ngidul nadahi tumetese banyu bun

Rebutan!! Rebutan padha kewan
Rebutan!! Rebutan karo kewan

Kewane ora isa ilang

Sing penting mangan

Aja nganti kepangan

Asu gedhe sih tetep menang kerahe

Merga gedhe akeh kancane

Merga gedhe mangan kancane

            Sih ngrembaka nganti jaman samono

            Iki jaman ngedan

            Kapinteran dadi modhal

            Modhal kanggo nuku kajujuran

            Kajujuran mung payu sewu

Saiki wis padha pinter

Eman yen ora kanggo minteri!!!
hehe..... (ngedan).

Surabaya, 24 maret 2014

Read More

Lingsing wengi

Jumembare pagelaran kang kagelar

Ngutus pacobaning dhiri

Mlaku jroning dalane crita

Becik-ala ana karma

Abang biru pilihanmu

Pilih kang pinilih

Mekare kembang pratandha abang

Dadi dalan muncare panyawang

Iki pilihanmu

Iku critamu

Mung kari impen mangan duren

Aja leren!!!

Lingsire wengi bisa bali

Panyuwun suci marang gusti

Kalianak, maret 2013

Read More